Në seancën e kaluar, deputeti i Kuvendit të Kosovës nga radhët e Partisë Demokratike të Kosovës, Ardian Kastrati ironizoi me deputetin e Vetëvendosjes, Jahja Koka, duke thënë se është prekur shumë që kryeministri Albin Kurti nuk e ka përfshirë në raportin 100 ditësh të punës raketën e deputetit Kokaj.
“…pasi dëgjova këtë raportin volumoz të kryeministrit kisha përshtypjen se po flet një kryeministër i një shteti me shtatë koka bërthamore, apo dhjetë që i ka.
Ama u preka shumë se nuk e futi arritjen kulminante të tre mujorin të parë. Pasi ishin ato statistikat, 5 milionë, 20 milionë, 30 milionë, por se futi këtë raketën e Jahja Kokës. Pasi veç me hyp në raketë dhe për tre muaj ky eci përpjetë. Ama më erdh edhe me qajtë pak, qysh s’ka lind ky njeri para dy shekujve, para Hasan Prishtinës dhe Ismail Qemalit me rehatu këtë vend. Kjo është e dhimbshme”, ishte shprehur Kastrati.
E deputeti Kokaj që nuk ishte i pranishëm seancën e kaluar, në këtë seancë iu kundërpërgjigj Kastratit me poezi e thënie.
Madje Kokaj tha se Kastrati po të kishte të kryer vetëm shkollën fillore do të kuptonte çka është shpejtësia parakozmike.
“Një zotëri i veshur si dordolec me disa lara primitive që kishe vendosur në tula të kraharorit të tij tallej e lazdrohej me disa metafora duke lakuar edhe emrin tim”, tha Kokaj.
“Puna e defit dhe tupanit kanë zhurmë të madhe por brendësi boshe”, tha deputeti i LVV-së, i cili lexoi poezi e thënie. /Telegrafi/
