Kosova humbi një prej basketbollistëve më të mirë të saj, Gazmend Sinanin.
Reprezentuesi 27 vjeçar sigurisht se ishte ftuar nga përfaqësuesja e Kosovës, ashtu sikurse në grumbullimet tjera për të mbrojtur ngjyrat e shtetit.
Në qarqet e basketbollit, Gazi njihet si një punëtor i madh i basketbollit, i cili gjithnjë ishte prezent në grumbullimet duke zbatuar me përpikmëri urdhërat e përzgjedhësve, të cilët ndërroheshin, por Gazi ishte i pa ndërrueshëm në përfaqësuesn e Kosovës.
Si një prej qendrave më të mira ai ka fituar gjithçka në basketbollin kosovar si pjesë e Sigal Prishtinës.
Ishte sezoni kur klubi i kryeqytetit rrëmbeu të gjithat trofet vendore, atë të Superligës, Kupës së Kosovës.
Gazi ishte pjesë e Sigal Prishtinës edhe kur për herë të parë një klub nga Kosova fitoi trofe ndërkombëtar, atë të Ligës Ballkanike në mbrëmje të paharruara në kryeqytet.
Më pas një prej qendrave më të respektuara ka qenë edhe pjesë e Bashkimit, e më pas kaloi në Angli ku realizoi një seri performancash, për t’u kthyer sezonin e kaluar te KB Rahoveci ku luajti katër ndeshje.
Në katër ndeshje për Rahovecin në sezonin e fundit ai regjistroi 13 pikë për ndeshje dhe 11.3 kërcime, një mesatare double-double.
Mesataret double-double për Gazmend Sinanin ishin të lehta dhe jo ndonjë statistikë vështirë e arritshme edhe pse konsiderohet e tillë për tjerë basketbollistë.
Ai me këto performanca vazhdoi edhe te Leeds Force në elitën e basketbollit britanik ku ai zhvillloi 15 ndeshje me mesatare prej 15.3 pikësh dhe 10.9 kërcimesh, sërish një mesatare double – double.
Gazmend Sinani lë boshllëk të madh në basketbollin kosovar në të gjitha aspektet.
Si një qendër gjigante që kombinohej mirë me basketbollistët tjerë në skemat e sulmit, basketbollistë të cilët i pati shumica miq, ai do të jetë një mungesë e madhe, sepse basketbolli kosovar vuan për talentë në pozitën 5, apo atë të qendrës.
Por, mbi të gjitha Gazmend Sinani do të mungohet si një sportist dhe djalosh shembullor, sepse basketbollisti 27 vjeçar krijoi vetëm miq, ku gjithmonë ka treguar etikë të jashtëzakonshme sportive të punës me të gjithë trajnerët që ka punuar.
I gjithë basketbolli është në zi, për Gazin, djaloshin i cili i bënte të gjitha dhe bënte gjithçka për bashkëlojtarët dhe ekipin. Ngushëllime të thella familjes, bashkëlojtarëve, tifozëve dhe gjithë Kosovës! /Telegrafi/