Policia e Kosovës, konkretisht Njësia për Hetimin e Krimeve Ekonomike dhe Korrupsionit në Gjilan pas një pune operative profesionale në terren, ka siguruar informacione se dy persona të dyshuar meshkuj/shqiptar/kosovar Q.A. (1953) dhe SH.B. (1964), merren me falsifikim dhe shpërndarje të parave.
Hetuesit rajonalë për hetimin e krimeve ekonomike dhe korrupsionit në PK, në koordinim dhe bashkërendim me prokurorinë kompetente në Gjilan kanë siguruar bazën ligjore për aplikimin e masave të përcaktuara me ligj dhe më datë 27.09.2019, është realizuar një operacion për kapjen e personave të dyshuar.
Si rezultat i këtij operacioni policor dy personat e dyshuar janë ndaluar në Suharekë dhe gjatë kontrollimit tek i dyshuari Q.A. (1953), janë gjetur dhe sekuestruar kartëmonedha (196 X 50), ose shuma e përgjithshme 9800 euro, që dyshohet se janë të zhytura-ngjyrosura dhe supozohet se janë para të grabitura.
Si vazhdimësi e operacionit policor janë kryer edhe bastisje në lokacionet e të dyshuarve në Prizren dhe Sallagrazhdë, përderisa me urdhër të prokurorit kompetent ndaj dy të arrestuarve është caktuar masa e ndalimit policor për 48 orë, për procedura të mëtejme.