Kancelari i ri i Gjermanisë, Olaf Scholz, u takua me liderët e tjerë të Bashkimit Evropian në samitin e Brukselit.
Antagonizmi rus në kufirin me Ukrainën dominoi agjendën pasi presidenti ukrainas, Volodymyr Zelenskyy u takua me Scholz dhe presidentin francez, Emmanuel Macron, si dhe presidentin e Këshillit Evropian, Charles Michel.
Scholz zhvilloi bisedime me Sekretarin e Përgjithshëm të NATO-s, Jens Stoltenberg, raporton dw.
“Ne do të theksojmë përsëri se paprekshmëria e kufijve është një bazë e rëndësishme për paqen në Evropë. Së bashku do të bëjmë gjithçka që kjo paprekshmëri të vlen”, tha Scholz.
Pjesëmarrja e kancelarit gjerman në takimin e Këshillit Evropian erdhi një ditë pas fjalimit të tij inaugurues në Bundestag dhe me një sërë krizash me të cilat BE-ja duhet të përballet, duke përfshirë tensionet e vazhdueshme me Rusinë dhe aleatin e saj, Bjellorusinë, si dhe pandeminë e coronavirusit dhe çmimet e larta të energjisë.
BE-ja tashmë po planifikonte të diskutonte sanksionet e mundshme që mund të vendoste, nëse Rusia do të ndiqte veprime agresive ndaj Ukrainës.
Zelenskyy të mërkurën u bëri thirrje udhëheqësve evropianë që të vendosin sanksione menjëherë në vend që të presin.
Rusia pushtoi dhe aneksoi Krimenë – një rajon i Ukrainës në Detin e Zi – në vitin 2014, dhe thuhet se që atëherë ka mbështetur luftëtarët separatistë pro-rusë në rajonin lindor të Donbasit.
Moska synon ta mbajë Ukrainën që të mos afrohet shumë me BE-në dhe NATO-n, duke kërkuar vazhdimisht që mundësia e pranimit të hiqet nga tavolina.
Udhëheqësit e BE-së dhe NATO-s kanë kundërshtuar kërkesën për të përjashtuar anëtarësimin e mundshëm, por gjithashtu thonë se Kievi është ende shumë larg anëtarësimit në secilën organizatë. /Telegrafi/