Sot (e premte) është dita e fundit e kampit stërvitor të Real Madridit në Kosovë ku morën pjesë 150 fëmijë të cilët u trajnuan me metodologjitë e klubit mbretëror të Real Madrid. Gjatë këtyre 5 ditëve, trajnerët e Akademisë së Real Madrid kishin për qëllim avancimin e talentëve të futbollit në vendin tonë.
Vajzat dhe djemtë e trajnuar nga trajnerët e Akademisë së Real Madrid Francisco Garcia dhe Ignacio Abascal në kampin e mbajtur kanë kaluar një javë me përplot aktivitete.
Trajnerët u ndanë shumë të kënaqur me organizmin dhe mënyrën e zhvillimit të këtij kampi, ku po ashtu ishin entuziastë që është krijuar kjo mundësi për fëmijët.
Trajnimi është zhvilluar përmes metodologjisë “The Real Way”, metodologji kjo e përdorur nga klubi i Real Madridit, ku është e bazuar në një analizë të plotë të zhvillimit në përgjithësi duke kombinuar me trajnimin individual dhe po ashtu ka mësuar rreth vlerave si udhëheqja, puna në ekip, respekti dhe përkushtimi ndaj futbollit.
Andi, pjesëmarrës në kamp stërvitor në një intervistë është shprehur se: “Gjatë kampit të Real Madridit kemi mësuar shumë teknika të reja të cilat mund të shërbejnë në lojëra, po ashtu na kanë treguar për elemente të ndryshme duke përfshirë edhe mënyrën se si ndërtohen aksionet në futboll të cilat nuk i kemi mësuar më herët.”
Zero Pozitive, Robin Krasniqi dhe STE kanë ofruar mundësinë unike dhe emocionuese për talentët e rinjë duke sjellë në Kosovë kampin e Real Madrid.