Leroy Sane është shumë pranë rikthimit në Bundesliga, ku ka arritur një marrëveshje me Bayern Munichun.
Sulmuesi gjerman është futur në vitin e fundit të kontratës me Manchester Cityn dhe nuk ka pranuar rinovimin e saj.
Ka qenë trajneri Pep Guardiola që dy ditë më parë ka konfirmuar se Sane do të largohet në verë nëse vije oferta e duhur.
Është raportuar se anësori 24-vjeçar ka një marrëveshje personale me Bayernin, por drejtori i kampionëve në fuqi të Gjermanisë, Oliver Kahn i është shmangur pyetjeve për të.
“Ne do të flasim vetëm për transferimet që i kemi përfunduar”, tha fillimisht Kahn për ZDF.
“Sane ka edhe një vit kontratë me Cityn dhe nga këndvështrimi ekonomik duhet të jemi shumë të kujdesshëm. Nuk kam asgjë për të thënë për momentin”, ka deklaruar drejtori i bavarezëve.
Javë më parë është raportuar se Bayerni ka ofruar 40 milionë euro për lojtarin, por marrëveshja me Cityn duket ende larg pas gjiganti anglez kërkon rreth 60 për ta lënë të lirë anësorin. /Telegrafi/