Këngëtarja Ryva Kajtazi ka mbi dy vite që i ka munguar skenës.
Impenjimet e saj në jetën private dhe angazhimi si nënë e kanë lënë pak mbrapa në aspektin e prurjeve të reja muzikore, por kjo nuk do të zgjasë edhe për shumë kohë.
Kjo pasi këngëtarja ka përgatitur një projekt të ri muzikor, në bashkëpunim me Shqiprim Kelmendin, të cilin pret ta lansojë brenda pak ditësh.
Në një bisedë për Telegrafin, Ryva ka folur rreth këngës së re, e cila do të jetë ritmike dhe shumë e përshtatshme për sezonën e verës.
“Sapo kemi përfunduar xhirimet e klipit për këngën time më të re në bashkëpunim me Shqiprim Kelmendin. Këngën e ka punuar Ardian Kastrati, tekstin e ka shkruar Kreshnik Avdiu, gjersa për klipin janë kujdesur produksioni nga Gjilani, Urban Graphics”, tha Ryva Kajtazi për Telegrafin.
Këngëtarja tutje tregon se ky rikthim i saj pas një kohe të gjatë, i ka dhënë shumë energji asaj për të punuar rreth projekteve të reja.
“Pas një pauze në fushën artistike, mendoj se jam rikthyer me energji shumë të mirë, shumë pozitive, me një frymë të re në përgjithëse”, tha Kajtazi.
Ditë më parë kanë përfunduar edhe xhirimet e klipit, teksa këtë herë dyshja në bashkëpunim me produksionin kanë zgjedhur Shkodrën si qytetin më të veçantë për të vizualizuar me pamje këngën e tyre të re.
“Kënga e re titullohet “Thehet zemra”. Është një tekst me temë dashurie sigurisht. Klipi është xhiruar i gjithi në Shkodër në ambient të hapur. Xhirimet kanë zgjatur një ditë të plotë. Për dukjen time janë kujdesur Vlora dhe Kaltrina, për flokët ‘Andrra Atelie’, dhe për makijazhin, Erisa Gashi”, tregoi më tej Ryva.
Në përfundimin e bisedës, këngëtarja tregoi se do të jetë shumë aktive gjatë verës, tani që po rikthehet me projekte të reja muzikore.
“Do të jem aktive gjithsesi. Në planet e mia të afërta është edhe një këngë me klip solo, pastaj jemi në prag të zezonës verore, ku do të jem shumë e angazhuar në dasma”, ka përfunduar Ryva Kajtazi për Telegrafin.
Përndryshe, këngëtarja ka ndarë me ndjekësit e saj në rrjetet sociale imazhe nga xhirimet e klipit të ri si dhe trailerin, ku ka treguar se do të shfaqet mjaft atraktive dhe provokuese, duke vënë në pah format trupore. /Telegrafi/
Shikoni më poshtë trailerin e klipit të ri të Ryva Kajtazit:
