Një burrë i dhënë shumë pas stuhive, ka menduar një ide të pazakontë që t’i ndjekë ato – ka ndërtuar një veturë të blinduar me të cilën mund t’iu afrohet dhe t’i filmojë aktivitetet e tyre.
Ryan Shepard ka nxjerrë në rrugë veturën që ndjek tornadot dhe që për herë të parë ishte përdorur në filmin e Hollywoodit, “Tornado Alley” . Ajo mund t’i rezistojë erërave të fryjnë me shpejtësi prej 280 kilometra në orë, transmeton Telegrafi.
Vetura peshon 6,350 kilogramë dhe ngjan shumë me veturën e Batman ndryshe e njohur si “Batmobile” apo me atë të “Mad Max”, ku në rolin kryesor luan Mel Gibson. Për herë të parë ishte prodhuar në vitin 2007, kurse si asistent i produksionit të filmit që ishte xhiruar në vitin 2011, pati rastin ta shoh nga afër.
Bëhet fjalë për veturën Dodge Ram 3500 që është modifikuar në detaje. Shepard e bleu atë nga filmbërësi Sean Casey dhe nga Illinois për në shtëpinë e tij në Colorado, e voziti i vetëm. Ai pranoi se gjatë udhëtimit dyditor, pothuajse gjatë çdo ndalese nëpër pompa njerëzit e kishin pyetur se ku e kishte marrë.
Por, Shepard nuk u kënaq me kaq dhe i bëri disa përmirësime. Kjo veturë ka një rezervuar prej 340 litrave dhe mund të udhëtojë deri në 1,300 kilometra pa pasur nevojë për rimbushje. I reziston erërave që fryjnë deri në 280 kilometra në orë – që do të thotë se i afrohet shumë pranë tornadove, që pothuajse gjithçka shkatërrojnë para vetes.
Vetura është e mbështjellur me dy shtresa të metalit, xhamat janë rezistentë ndaj plumbave dhe gomat janë punuar enkas për terrene malore. /Telegrafi/
