Juventus udhëton drejt Barcelonës për trofeun Gamper që zhvillohet nesër (e diel) dhe është gati të hyjë në bisedime me Blaugranat për Miralem Pjanic.
Sipas La Gazzetta dello Sport, kthimi i mundshëm i boshnjakut nuk është një alternativë për Manuel Locatelli, por ideja është që të dy të sillen në Allianz Stadium.
Kthimi i Massimiliano Allegrit në Juventus ka nxitur zërat për një rikthim për Pjanic, i cili u bashkua me Barcelonën pas një sezoni me Maurizio Sarrin më 2019-20.
Sipas raportit, Barcelona mund të jetë e gatshme ta lejojë Pjanic të largohet si një transferim falas, por ish-mesfushori i Romës do të duhej të hiqte dorë nga një marrëveshje trevjeçare.
Gazeta pretendon se alternativa tjetër është një marrëveshje huazimi dyvjeçare, por që Juventusi nuk mund të arrijë as gjysmën e pagës së lojtarit në Camp Nou.
Barça duhet të kujdeset për pjesën tjetër, duke ndihmuar në pagimin e një pjese të pagës dhe Pjanic, nga ana e tij, duhet të heqë dorë nga disa para.
Raporti vazhdon të pretendojë se distancat midis ofertës së Juventusit dhe kërkesës së Sassuolos për Locatelli janë të pandryshuara.
Juventusi i konsideron 32 milionë eurot e ofruara si një çmim i drejtë për italianin, ndërsa Sassuolo është duke pritur për një ofertë të re, pasi Bianconerët po shpresojnë të sigurojnë të dy mesfushorët këtë verë. /Telegrafi/