Jurgen Klopp cilësohet si një ndër trajnerët më të mirë në botë nga shumë persona dhe një ndër aryset për këtë është edhe për faktin që ai u jep mundësinë edhe lojtarëve të rinj nga akademia që të shfaqin potencialin e tyre.
Emra si Trent Alexander-Arnold dhe Curtis Jones të cilët sot me sukses e përfaqësojnë Liverpoolin në garat në nivel vendi dhe atë ndërkombëtare, duhet t’i falenderohen Kloppit për besimin që pati tek ta.
Këtë sezon emra si Jarell Quansah, Conor Bradley dhe tani James McConnell janë ftuar në ekipin e parë të Liverpoolit.
Sezonin e kaluar, Stefan Bajcetic i la pa fjalë të gjithë me performancat e tij në fushë, pasi spanjolli në shumë ndeshje e la në bankën rezervë Fabinhon, i cili konsiderohej gjerësisht si një ndër më të mirët në pozitën e tij.
Për këtë arsye, tekniku gjerman nuk e ka përjashtuar mundësinë që këta katër lojtarë të marrin më shumë minuta gjatë këtij sezoni.
“Po, ju nuk i njihni ende ata, ose ndoshta i njihni por ata do të kenë më shumë mundësi për të luajtur dhe më e mira ende nuk ka ardhur”, ka thënë Klopp.
“Sot Bobby Clark nuk luajti por unë mendoj se ai ka bërë mjaft mirë gjatë ndeshjeve të fundit. Trey Nyoni dhe Jayden Danns veçanërisht nga grupmoshat U18, ka shumë potencial tek lojtarët e rinj, akademia është në një moment të mirë, do të thoja se po prodhon talent të mëdhenj, është e mrekulleshme”, është shprehur gjermani.
“Nuk ka të bëjë me dhënien e mundësive, ka të bëjë me faktin se ata po trokasin në derë dhe unë nuk mund ta injoroj këtë, ata po bëjnë për mrekulli”, përfundoi 56-vjeçari./Telegrafi/