Së fundmi, në platformën TikTok është publikuar një video që tregon reagimin e artistes shqiptare me nam ndërkombëtar, Bebe Rexha, pasi pranoi një dhuratë të veçantë nga kompania kosovare ZiuuRugs.
Tapeti origjinal, i punuar me simbolin e saj dhe të shqiponjës, e la këngëtaren tërësisht të befasuar dhe pa frymë.
Në video, Bebe Rexha shfaqet duke e shikuar tapetin dhe duke reaguar me emocion: “O Zot çfarë është? Është e mrekullueshme? Nga jeni ju djema, nga Kosova? Duket sikur të gjithë këtu janë nga Kosova”, tha interpretuesja e hitit “I’m Good (Blue)” – pasi aty pranë ishte edhe grimerja e saj e turneut, Dafina Neziri, e cila gjithashtu është nga Kosova, duke e bërë momentin edhe më të veçantë.
Kompania ZiuuRugs, e themeluar nga disa të rinj të talentuar në Kosovë, ka bërë emër në dizajnimin dhe prodhimin e tapeteve të veçanta. Me kreativitetin dhe përkushtimin e tyre, ata kanë arritur të tërheqin vëmendjen e disa emrave të njohur ndërkombëtarë, duke përfshirë dhe Bebe Rexhën.
Dhurata e veçantë ka marrë shumë vëmendje në rrjetet sociale, duke promovuar kështu punën e shkëlqyer të kësaj kompanie të re dhe premtuese nga Kosova. /Telegrafi/
.