Në kuadër të aktiviteteve që BONEVET organizon vazhdimisht për anëtarët tanë vjetorë, pjesë e planprogramit edukativ ishte edhe tema e riciklimit dhe benefitet e saj.
Në pjesën e dytë të vitit 2020, ekipi përgjegjës për angazhimin e anëtarëve në programin ‘’Mësimi i Bazuar në Projekte’’ (Project Based Learning), morën iniciativë të inkuadrojnë anëtarët më të rinj në garën vetëdijësuese ‘’Një jetë e re për shishen’’.
Qëllimi i kësaj gare kreative ishte të inkurajoj, angazhoj dhe nxisë kuriozitetin e anëtarëve për të imagjinuar, eksploruar dhe krijuar metoda të reja për ripërdorimin e plastikës.
Gara e organizuar ishte e hapur për të gjithë anëtarët e BONEVET dhe mblodhi numër të konsiderueshëm të tyre. Për t’u bërë pjesë e kësaj gare, materiali bazë që nevojitej ishte plastika, normalisht duke shtuar dekorime sipas kreativitetit dhe dëshirës.
Kriteret për përzgjedhjen e punimeve u bazuan në origjinalitet, dobi, funksionalitet dhe estetikë, dhe secili nga pjesëmarrësit fitoi shpërblime të ndryshme. Të gjitha këto kishin qëllim edukativ, që kjo nismë të zhvillohet edhe përmes ideve dhe projekteve të tjera.
Jona Perteshoni ishte anëtarja që zuri vendin e parë në këtë garë, e cila u shpërblye me “Arduino KIT”. Nga tani, Jona do të ketë mundësi të zhvillojë pasionin e saj për elektronikën dhe të krijoj punime funksionale për jetën e përditshme.
“Gara e riciklimit e organizuar nga BONEVET për mua ka qenë shumë interesante dhe argëtuese. Unë si anëtare vjetore për herë të parë kam qenë pjesë në një sfidë kaq kreative dhe vetëdijësuese. E falënderoj safin e BONEVET për vlerësimin dhe inspirimin për të vazhduar tutje’’ – u shpreh Jona.
