Johnny Depp ka ngritur padi kundër ish-gruas së tij, Amber Heard dhe kërkon dëmshpërblim prej 50 milionë dollarësh (44 milionë euro) për shpifje.
Çifti u nda në vitin 2016, ndërsa aktorja ishte ankuar për dhunë familjare, teksa për të njëjtën gjë kishte shkruar në një artikull në Washington Post në dhjetor të vitit të kaluar.
Në shkrimin e saj, 32-vjeçarja pohonte se ka qenë viktime e abuzimit familjar duke iu referuara aktorit, edhe pse emri i Depp nuk është përmendur specifikisht.
Ekipi ligjor i 55-vjeçarit ka thënë se, sipas artikullit, Depp ka ushtruar dhunë kundër Amber gjatë martesës së tyre, gjë që ai e mohon në mënyrë kategorike.
“Znj. Heard ka shkruar nga perspektiva ‘e një figure publike që flet për abuzimin familjar’… Artikulli vë në pah argumentin, sipas të cilit, znj. Heard ka qenë viktimë e dhunës familjare dhe z. Depp ka ushtruar dhunë familjare ndaj saj…”.
“Kjo nënkupton se z. Depp është një ushtrues i dhunës familjare, gjë që është kategorikisht dhe është dëshmuar si gënjeshtër. Z. Depp asnjëherë nuk ka abuzuar me znj. Heard. Akuzat e saj ndaj tij kanë qenë të rreme kur janë thënë në vitin 2016”.
“Kanë qenë një mashtrim i përgatitur për të gjeneruar publicitet për znj. Heard dhe për ta avancuar në karrierë”, thuhet mes tjerash në dokumentet e dërguara në gjykatë nga avokatët e aktorit.
Nga ana tjetër, avokati i Amber ka thënë për People se kjo është vetëm një përpjekje e radhës nga Depp për ta heshtur klienten e tij. /Telegrafi/