Joao Mario ka thënë se ndjehet i kënaqur me vendimin për t’u transferuar te Interi dhe thotë se Serie A është një kampionat shumë i fortë taktikisht.
Mesfushori u transferua te Nerazzurrët nga Sportingu i Lisbonës gjatë verës për një shumë prej 40 milionë euro, plus pesë milionë të tjera në formë bonusesh, ndërsa tash është kthyer në Estadio Jose Alvalade për shkak të angazhimeve me kombëtaren e Portugalisë.
“Jam krenar për atë që kam bërë te Sportingu… Natyrisht se kam paksa nostalgji, por tashmë jam këtu”, është shprehur ai në një konferencë për shtyp.
“Nuk pendohem për vendimin që kam marrë, jam shumë i kënaqur që jam transferuar te Interi. Liga italiane është shumë e fortë taktikisht, por njëherësh është shumë agresive, ka shumë përplasje”.
“Niveli në Itali është më i lartë se në ligën portugeze, jam i lumtur për atë që po bëj te Interi. Një pjesë e punës sime është që të luaj mirë te Interi, në mënyrë që të jem këtu”, ka thënë më tej futbollisti. /Telegrafi/