Jessica Simpson ka nderuar basketbollistin Kobe Bryant dhe tetë personat e tjerë, përfshirë vajzën e Bryant, Gianna, të cilët humbën jetën tragjikisht në një përplasje me helikopter në Calabasas, Kaliforni, të dielën në mëngjes.
Këngëtarja, 39-vjeçe, postoi një shkrim për ta në rrjetet sociale me një fotografi të momentit kur bashkëshorti i saj, Eric Johnson, ‘kapi’ peisazhin malor ku ndodhi incidenti.
“Eric e bëri këtë fotografi nga oborri i shtëpisë sonë menjëherë pasi ndodhi aksidenti ku Kobe, vajza e tij dhe shpirtra të tjerë të bukur u ngritën për të qenë me Zotin në amshim”, shkroi Simpson. “Ne mund të shohim helikopterët që fluturonin mbi shtëpinë tonë dhe unë ndjeva humbjen. Ndjeva fuqinë në qiellin e qiejve që ndaheshin për të bërë vend që të ngrihen më të mëdhenjtë e engjëjve”.
“Zemra ime është thyer plotësisht për të gjitha familjet dhe të dashurit e mbetur pas duke u përpjekur të kuptojnë gjërat në këtë moment tragjik”, shtoi më tej stilistja.
“Vanessa, ju jeni gruaja dhe femra që e përkrahët burrin tuaj deri në madhështi. Lutjet e mia janë të vazhdueshme për të gjithë të prekurit nga kjo humbje”.
Ylli i NBA-së ishte 41-vjeçar, ndërsa vajza e tij, Gianna ishte 13-vjeçe.
Sipas ESPN, Kobe, Gianna dhe pasagjerët e tjerë ishin në rrugën e tyre drejt një loje basketbolli të të rinjve kur ndodhi përplasja.
Bryant ka lënë pas gruan e tij, Vanessan, 37-vjeçe, dhe tri vajzat e tjera: Natalia, 17, Bianka, 3 dhe Capri, shtatë muajshe. /Telegrafi/
