Marka e bukurisë së Jennifer Lopez, ‘JLo Beauty’, bëri një gabim të vogël të dielën, duke postuar një ‘selfie’ ku ajo mbante një varëse me emrin ‘BEN’ në të.
Këngëtarja, 55 vjeçe, e cila aktualisht është në proces divorci me Ben Affleck, 52 vjeç, e postoi sërish në story, para se të fshihej nga të dyja llogaritë në Instagram, shkruan DailyMail.
Në fotografi, ylli i filmit “Hustlers” shfaqet me një pamje vjeshtore, e veshur me një xhaketë kafe dhe një këmishë të bardhë poshtë saj. Ajo kishte të vendosur disa zinxhirë ari, përfshirë varësen delikate me emrin Ben, të cilën Affleck e kishte dizajnuar vetë për ditëlindjen e saj në vitin 2022, sipas People.
Postimet u fshinë pasi fansat filluan të vërejnë aksesorin elegant që përmbante emrin e ish-bashkëshortit të saj.
Një person shkroi: “Varësja me ‘BEN'”, me një emoji zemre në sy.
Postimi më pas u zëvendësua me disa foto të produkteve, përfshirë qirinj, një pastrues fytyre, dhe imazhe vjeshtore me gjethe.
“Ka edhe të tjerë që janë të emocionuar që më në fund ka ardhur Dita e Parë e Vjeshtës? Shfletoni për tabelën tonë të inspirimit dhe na tregoni çfarë ju emocionon më shumë për këtë sezon më poshtë”, thuhej në mbishkrimin e postimit.
Varësja prej ari me emrin ‘Ben’ është një aksesor luksoz nga marka ‘FoundRae’, ku çmimet zakonisht janë mijëra dollarë.
Gjithashtu, varësja përfshinte një zemër të varur si pjesë e dizajnit.
Ajo është parë më parë duke mbajtur këtë aksesor disa herë, përfshirë në një video në Instagram në mars të vitit 2023.
Affleck kishte bashkëpunuar me ‘FoundRae’ për një tjetër varëse në vitin 2021 – një medaljon që përfaqësonte ndjesinë e të qenit “i egër” dhe “i pakontrolluar”.
Beth Bugdaycay, drejtoresha kreative dhe bashkëthemeluese e ‘FoundRae’, kishte punuar me Ben për krijimin e dhuratës.
Kjo nuk ishte hera e parë që Lopez kishte treguar dashurinë për Affleck përmes bizhuterive.
Në nëntor 2022, ajo mbante një varëse prej argjendi me mbishkrimin “Jennifer & Ben” të dizajnuar nga Jennifer Zeuner.
Javën e kaluar, çifti tashmë i ndarë u ribashkua për herë të dytë mes betejës së tyre të divorcit – disa ditë pas një dreke të tensionuar në Beverly Hills.
Sipas TMZ, çifti u pa së bashku të martën në mbrëmje, gjatë një aktiviteti të kthimit në shkollë të fëmijëve të tyre në Los Angeles.
Lopez ndan binjakët 16-vjeçarë Max dhe Emme me ish-bashkëshortin Marc Anthony, 56 vjeç, ndërsa Affleck ka tre fëmijë – Violet, 18, Fin, 15, dhe Samuel, 12 – me ish-gruan Jennifer Garner, 52 vjeçe. /Telegrafi/
