James Rodriguez pritet të largohet nga Evertoni pas vetëm një viti qëndrim në Goodison Park.
Mesfushori kolumbian është i lidhur me një kalim te gjiganti italian Milan dhe tanimë ka folur rreth të ardhmes së tij.
Rodriguez nuk e ka mohuar faktin se do t’i pëlqente të transferohej në Serie A, pasi është vetëm ai nga kampionatet e mëdha që i mungon.
30-vjeçari ka luajtur në La Liga me Real Madridin, Ligue 1 me Monacon, Bundesliga me Bayern Munich dhe së fundmi në Ligën Premier me Evertonin.
“Do të doja të luaja në një vend ku më duan dhe më vlerësojnë”, tha fillimisht kolumbiani.
“Unë kam luajtur tashmë në të gjitha kampionatet e mëdha, besoj se këtë gjë e kanë bërë shumë pak futbollistë. Vetëm Italia më mungon, Serie A do të ishte një opsion i mirë, por ta shohim”, ka thënë James.
Deklarata e James është një mesazh i mirë për Milanin që po e shikojnë kolumbianin si zëvendësuesin adekuat për Hakan Calhanoglun e larguar. /Telegrafi/