Ekipet e shpëtimit në qytetin Rafah në jug të Gazës, kanë arritur të nxjerrin gjallë një foshnje që kishte mbetur e ngujuar nën rrënoja pas sulmit ajror të izraelitëve, raporton BBC.
Shumë persona kishin gërmuar me duart e tyre për ta nxjerrë Mariam Abu Akel, që kishte mbetur nën rrënojat e ndërtesave të shkatërruara, transmeton Telegrafi.
Një burrë e dërgon me urgjencë në spitalin më të afërt, nga ku konstatohet se përveç disa prerjeve në trup, gjendja shëndetësore e foshnjës është stabile.
Foshnja ishte në shtëpi me familjen kur ndodhi sulmi ku si pasojë i janë vrarë nëna dhe motra, raporton Reuters. Ndërkaq babai dhe vëllai i saj kanë mbijetuar.
Në po të njëjtin sulm ajror kanë humbur jetën 20 persona dhe 55 tjerë janë lënduar, ka bërë të ditur zëdhënësi i ministrisë së Shëndetësisë që udhëhiqet nga Hamasi. /Telegrafi/
