Ish-deputeti në Kuvendin e Maqedonisë Izet Zeqiri, mbrëmë për Alsat tha se ikja e Gruevskit flet për karakterin e tij dhe se ai nuk e meriton epitetin e liderit.
“Ikja e Gruevskit flet për karakterin e tij. Ikja nga vendimi për të shkuar në burg i mohon atij epitetin e të qenit lider. Gruevski nuk tregoi patriotizëm. Ikja flet se ai nuk e ka dashur vendin e vetë. Ikja e tij do të përçaj edhe më shumë OBRM-PDUKM-në”, deklaroi Izet Zeqiri.
Ai shtoi se ka përshtypje se në Maqedoni nuk funksionon shteti juridik.
“Pushteti ka qenë në dijeni. Për këtë ka shkruar edhe në media. Kishte edhe tituj ku thuhej se vallë qeveria do t’i mundësoj Gruevskit që të ikë në Hungari. Kjo do të dobësoj edhe më shumë OBRM-PDUKM-në opozitare dhe kjo i shkon për shtati partisë në pushtet, që do të përfitoj edhe më lehtë t’i kaloj ndryshimet kushtetuese dhe çështjet e tjera”, tha Zeqiri.
Sipas tij vetë fakti që kryeministri nuk kërkon përgjegjësi nga ministri i Punëve të Brendshme lë hapësirë për të dyshuar se bëhet fjalë për një skenarë mirë të orkestruar.