Një infermiere britanike iu është nënshtruar trajtimeve spitalore për coronavirus, pavarësisht se doli në tre teste negative.
Sipas mediave të huaja, përcjell Telegrafi, punonjësja e Shërbimit të Shëndetit Kombëtar (NHS), Nicole Williams u pranua në Spitalin Universitar të Uellsit në Cardiff, ku një skanim CT zbuloi se ajo në të vërtet e ka sëmundjen.
Diagnoza e saj u konfirmua me një test të katërt, i cili rezultoi pozitiv – pothuajse tre javë pasi iu shfaqën simptomat për herë të parë.
“15 ditët e fundit kanë qenë sinqerisht të tmerrshme”, ka thënë Williams në një postim në Facebook.
“Nëse mendoni që të qenit i ri, i aftë, apo pa sëmundje ekzistuese, ju bën të shpëtoni nga coronavirusi, ju lutem mendoni përsëri”, ka thënë ajo.
Williams ndër tjerash u shpreh se në fillim ajo vuante nga një kollë dhe dhimbje e butë e fytit. /Telegrafi/
