Ish-ministri rus i Punëve të Jashtme, Andrey Kozyrev ka bërë një deklaratë kundër siç i ka quajtur ai gënjeshtrave të presidentit Vladimir Putin.
Siç njofton Khodorkovsky Communications Center, e cila drejtohet nga Mikhail Khodorkovsky një biznesmen në ekzil, NATO nuk është kërcenim për Rusinë.
“NATO nuk na kërcënon, askush nuk na kërcënon në Evropë. Sipas definicionit, këta janë partnerët dhe miqtë tanë, ne duhet të integrohemi me ta pa humbur identitetin tonë kombëtar”, njofton Khodorkovsky Communications Center duke cituar ish-ministrin Kozyrev, i cili kishte qenë në detyrën e kryediplomatit nën drejtimin e Boris Yeltsinit.
Ditë më parë, Putin kishte thënë se NATO nuk duhet të zgjerohet në lindje.
“Ne thjesht shtruam pyetjen se nuk duhet të ketë më lëvizje të NATO-s në lindje. Topi është në fushën e tyre, ata duhet të na përgjigjen me diçka”, ishte shprehur Putin.
Ky reagim kishte ardhur pasi Rusia kishte vendosur mbi 100 mijë trupa ushtarake në kufi të Ukrainës. /Telegrafi/