Ish-legjenda e Real Madridit, Guti, ka akuzuar Xavin se ka marrë drejtimin e Barcelonës në kohë të gabuar dhe ishte kundër vendimit të tij për të dhënë dorëheqje nga posti i trajnerit.
Në janar, Xavi kishte njoftuar për vendimin e tij që të largohet nga Barcelona në fund të sezonit. Vendimi i tij është përcjellur me reagime të forta në futbollin spanjoll dhe tani ish-mesfushori i Real Madridit, ka qenë i fundit që ka reaguar.
Guti e ka ‘goditur’ Xavin në një paraqitje në televizionin e njohur spanjoll El Chiringuito, duke thënë se ai nuk ishte gati për t’u bërë trajner i Barcelonës.
“Xavi Hernandez nuk ishte i përgatitur për të ardhur tek Barcelona. Ai ka menduar se gjithçka do të ishte shumë e lehtë, jo. Kur ju merrni licencën në Katar dhe stërviteni në një ndeshje ku marrin pjesë 300 persona. Nuk është e njëjta që të ulesh në stolin e Barcelonës, ky është realiteti”, ka thënë Guti.
Pasi fituan La Ligan sezonin e kaluar, blaugranasit kanë pasur vështirësi të mëdha në aspektin financiar këtë sezon. Ata gjejnë veten tetë pikë larg liderit Real Madridit dhe tashmë janë eliminuar nga Kupa e Mbretit.
Legjenda e Barcelonës do të qëndrojë në klub deri në fund të sezonit, kur atëherë katalunasit pritet që të emërojnë trajnerin e ri.
Emra si Hansi Flick, Thomas Tuchel dhe Rafa Marquez, që të gjithë janë lidhur me një kalim tek Barcelona, stoli i së cilës do të mbetet vakant së shpejti./Telegrafi/