Një person me inicialet G.M, nga Mitrovica, është ftuar sot për intervistë nga policia, pasi përmes Facebook-ut kishte bërë thirrje që të digjet zyra e presidentit dhe ajo e kryetares së Gjykatës Kushtetuese.
Kështu ka bërë të ditur në një prononcim për Telegrafin, avokati Musa Damati.
Ai tha se klienti i tij me inicialet G.M është ftuar për intervistim nga Policia e Kosovës në cilësin e të dyshuarit për veprën penale “Thirrje për rezistencë”, bazuar në nenin 403 të Kodit Penal të Republikës së Kosovës.
“Ndaj klientit tim ekziston dyshimi se përmes një komenti në rrjetet sociale ka aluduar në djegien e zyrës së Presidentit dhe të Kryetares së Gjykatës Kushtetuese, pas shpalljes së vendimit të Gjykatës Kushtetuese të Republikës së Kosovës”, ka thënë avokati Damati.
Siç tha ai intervista ka përfunduar dhe pritet që rasti ndaj G.M, të vazhdoj në procedurë të rregullt.
Në anën tjetër, edhe Avni Zahiti, zëdhënës i Policisë së Kosovës për rajonin e Mitrovicës, ka konfirmuar ftesën për intervistë nga ana e policisë.
“Po, personi është ftuar nga policia”, tha shkurt Zahiti. /Telegrafi/