Interi është duke planifikuar që të bëjë disa blerje gjatë verës, ndërsa një prej shënjestrave kryesore është mesfushori i Paris Saint-Germainit, Marco Verratti.
Nerazzurrët aktualisht janë nën kufizimet e rregullave financiare, por në fund të sezonit pritet të lirohen nga to, duke qenë se kushti është që të mos kenë deficit financiar gjatë vitit.
Në këtë mënyrë, ata mund të negociojnë me UEFA-n që t’i lejojnë pronarët e rinj, Suning Group, që të investojnë.
Si rezultat i kësaj, njofton Corriere dello Sport, konglomerati kinez planifikon investime të mëdha për ta përforcuar skuadrën nga sezoni i ardhshëm.
Marquinhos (PSG) është zgjedhja e parë në mbrojtje, derisa Kostas Manolas (Roma) e Stefan de Vrij (Lazio), janë opsionet tjera.
Në mesfushë është Verratti, i cili mund të kushtojë rreth 80 milionë euro, si dhe ka konkurrencë nga Real Madridi, Juventusi dhe Bayern Munichu. Opsionet tjera janë Lucas Biglia (Lazio) dhe Lorenzo Pellegrini (Sassuolo).
Në sulm, zgjedhja e parë është Federico Bernardeschi (Fiorentina) që kushton rreth 40-50 milionë euro. Domenico Berardi (Sassuolo) është alternativë, megjithëse Juventusi ka një marrëveshje për të.
Situata e Alexis Sanchezit te Arsenali po monitorohet nga afër, derisa Roger Martinez është një opsion më lirë duke qenë se klubi i tij, Jiangsu Suning, është po ashtu në pronësi të Suning Group. /Telegrafi/