Mijëra të rinj po presin që të bëhen pjesë e Forcës së Sigurisë së Kosovës.
Konkursi i Ministrisë së Mbrojtjes për rekrutimin e të rinjve për shërbim në FSK është hapur me datën 11 shkurt të këtij viti dhe është mbyllur me datën 22 shkurt.
E në këtë konkurs për t’u bërë pjesë e ushtrisë së Kosovës, kanë aplikuar mbi 6000 persona e prej tyre vetëm 650 do të kenë mundësinë të pranohen.
Numri i të interesuarve jo-shqiptarë për t’u bërë pjesë e ushtrisë së Kosovës, nuk është edhe shumë i lartë.
Nga të gjitha komunitetet pakicë në Republikën e Kosovës, janë vetëm 174 aplikantë të cilët kanë shprehur gatishmërinë të shërbejnë në Forcën e Sigurisë së Kosovës.
Këtë për lajmi.net e ka konfirmuar zëdhënësi i ministrisë së Mbrojtjes, Ibrahim Shala.
Ai është shprehur se numri i përgjithshëm i komuniteteve jo-shumicë që kanë aplikuar për të qenë pjesë e FSK-së është 174, duke përfshirë këtu edhe pakicën serbe.
Ndërsa procedurat e shqyrtimit, filtrimit dhe përzgjedhjes të cilat duhet ndjekur të gjithë aplikuesit janë kësisoj: Shqyrtimi fillestar i aplikacioneve, testi i aftësive, testi fizik, intervista me shkrim dhe me gojë, testin mjekësor, trajnimi, verifikimi, emërimi dhe e drejta e ankesës.
Vlen të theksohet fakti që nuk ka vende të siguruara për asnjë kategori të veçantë në këtë konkurs.
Deputetët e Kuvendit të Kosovës me 14 dhjetor i dhanë “dritën e gjelbër” shndërrimit të Forcës së Sigurisë së Kosovës në ushtri të Kosovës.
Me mbi 100 vota për nga të gjitha partitë politike përveç Listës Serbe, deputetët votuan tri projektligjet që ia ndërruan mandatin FSK-së në ushtri mbrojtëse të Kosovës, por pa ja ndryshuar emrin kësaj të fundit.