Andres Iniesta ka folur rreth të ardhmes së tij, duke theksuar se ende nuk ka vendosur se ku do të luaj pas largimit nga Barcelona.
Mesfushori spanjoll ka konfirmuar largimin e tij nga Barcelona në fund të sezonit pas plot 22 viteve të kaluara në klubin katalunas.
Rreth të ardhmes së tij janë përmendur shumë destinacione si Superliga e Kinës, ajo e Japonisë, por edhe Australia.
Megjithatë, Iniesta kur u pyet për të ardhmen e tij, mohoi se ka rënë dakord me ndonjë klub dhe ka thënë se po i mban hapur opsionet e tij.
“Unë kam thënë se transferimi im vlen vetëm për jashtë Evropës. Prandaj të gjitha skenarët janë të mundshëm”, ka thënë fillimisht Iniesta.
“Mediat po thonë se po shkoj në Kinë, pastaj në Japoni, dhe kam dëgjuar edhe për Australinë”.
“Do ta dini kur i them të gjithëve, pasi ka ende gjëra që duhet të zgjidhen, detaje të vogla dhe unë do të përpiqem të zgjedh opsionin më të mirë”, përfundoi spanjolli.
Ndryshe, Iniesta gjatë konfirmimit të largimit nga Barcelona ka thënë se është vendimi më i vështirë në jetë, pasi me katalunasit ka fituar gjithë trofetë e mundshëm. /Telegrafi/
