Gjykata Themelore në Prizren ka bërë të ditur se derisa po mbahej seanca gjyqësore ndaj të akuzuarit Remzi Shala, i akuzuar për krime lufte, pak para orës 12:00, saktësisht derisa po dëgjohej një dëshmitar, ka filluar një incident në mes të pranishmëve në sallë të gjykimit.
Në njoftim thuhet se pas incidentit seanca është ndërprerë.
“Është dashur intervenimi i Policisë së Kosovës, gardianëve të burgut dhe i sigurimit të Gjykatës (të cilët kanë qenë të pranishëm në sallë) për të ndërprerë incidentin dhe për të liruar sallën e gjykimit. Më pastaj Policia ka dërguar forca shtesë dhe kanë arrestuar të dyshuarit e rastit”, thuhet në njoftim.
Në sallë të gjykatës kanë qenë të pranishëm të dëmtuarit dhe familjarë të tyre, i akuzuari nën përcjellje të gardianëve të burgut si dhe familjarë të tij të afërt.
Në njoftim më tej thuhet se Gjykata i ka ofruar bashkëpunim Policisë, objekti i Gjykatës është i pajisur me kamera të sigurisë, në sallë dhe korridore të Gjykatës, të cilat do t’i shërbejnë Policisë së Kosovës për procedurën hetimore, për më tepër Gjykata do të pres raportin final pas procedurës hetimore nga ana e Policisë së Kosovës. /Telegrafi/