Një incident i rëndë ka ndodhur mbrëmjen e së shtunës në rrugën “Ganimete Tërbeshi” në Gjakovë, ku një zyrtar policor është sulmuar fizikisht nga dy persona të dyshuar.
Sipas raportit të Policisë së Kosovës, zyrtari i policisë ishte jashtë detyrës zyrtare në momentin e sulmit. Pas ngjarjes, viktima është dërguar për trajtim mjekësor.
Gjatë arrestimit të të dyshuarve, të cilët janë dy meshkuj dhe një femër, ka pasur rezistencë, duke rezultuar në lëndime të mëtejshme për tre zyrtarë policorë që po kryenin arrestimin.
Të gjithë të lënduarit, përfshirë të dyshuarit, kanë marrë trajtim mjekësor.
Pas intervistimit nga autoritetet, me vendim të prokurorit, dy të dyshuarit meshkuj janë dërguar në mbajtje, ndërsa e dyshuara femër është liruar në procedurë të rregullt.
Rasti po hetohet më tej nga autoritetet kompetente. /Telegrafi/