Agjenti i Elseid Hysaj thotë se klienti i tij kishte një ofertë nga një prej skuadrave më të mira në Evropë, por ai është 100 për qind i bindur se mund të fitojë Scudetton me Napoli.
Është raportuar më parë se skuadra e Napolit ka bërë një pakt për të qëndruar së bashku me mbrojtësin e kombëtares shqiptare dhe të përpiqet të fitojë titullin e Serie A këtë sezon, dhe përfaqësuesi i Hysajt duket se ka konfirmuar këtë.
“Hysaj është 100 për qind i bindur për të fituar Scudetton, nëse ai nuk do të ishte, do largohej nga Napoli”, ka thënë fillimisht agjenti Mario Giuffredi për Radio Kiss Kiss Napoli.
“Ai mori një ofertë serioze, konkrete dhe reale nga një prej ekipeve më të forta në Evropë, por ai as nuk e mori në konsideratë atë”, përcjell Telegrafi.
“Ai do të kishte marrë pagë edhe më të madhe se tani, por ai as nuk ka dashur të mendojë për këtë”.
“Nuk mund t’ju them se çfarë ekipi ishte, por ata përfunduan në dy vendet e para në një nga ligat më të mëdha evropiane”, përfundoi agjenti i Hysajt. /Telegrafi/