Ushtruesi i detyrës së kryetarit të Partisë Demokratike të Kosovës, Enver Hoxhaj ka reaguar lidhur me vendimin e Qeverisë Kurti për uljen e shtesave për pensionistët.
Hoxhaj ka thënë se ky vendim është sakandaloz, i papranueshëm dhe nëpërkëmbës.
“Skandaloz, i papranueshëm dhe nëpërkëmbës vendimi i Qeverisë Kurti për uljen e shtesave për pensionistët dhe mjekët e infermierët që po luftojnë me pandeminë. Kjo Qeveri që i la gjyshërit tanë pa vaksina tani po ua zvogëlon edhe atë pak mbështetje që u duhet për ilaçe”, ka shkruar Hoxhaj në Facebook.
Ai më tej ka theksuar se se pritja nga Qeveria për t’ua lehtësuar barrën e rënduar ekonomike, u kthy kundër tyre duke përgjysmuar shtesat financiare.
“Pritja nga qeveria për ta lehtësuar barrën e rënduar ekonomike, shëndetësore e sociale për qytetarët të goditur nga pandemia, e konkretisht për mjekët, punëtorët shëndetësorë e të moshuarit – përkundrazi u kthy kundër tyre duke përgjysmuar shtesat financiare. Mungesa e dorës së shtetit fatkeqësisht po ndjehet çdo ditë dhe në çdo familje të Kosovës”, ka shkruar Hoxhaj. /Telegrafi/
