Shefi i Grupit parlamentar i Lidhjes Demokratike të Kosovës, Avdullah Hoti në një konferencë për media e ka quajtur të dobët, të pasaktë dhe të shkruar keq raportin e Qeverisë së Kosovës për punën 100 ditësh.
Hoti në këtë konferencë lidhur me 100 ditët e punës së Qeverisë tha se raporti tregon qartë se ka mungesë të vizionit për referoma gjithëpërfshirëse.
Ai tha se raporti reflekton mungesë totale të kompetencës profesionale.
Sipas tij, Kosova është izoluar me këtë qeveri dhe vendimi për tu tërhequr nga anëtarësimi në Interpol është goditje për shtetin e Kosovës.
“Unë ju garantoj që vendi do të ishte më mirë pa këtë qeveri”, tha Hoti.
Shefi i Grupit parlamentar të LDK-së tha se premtimet e dhëna gjatë fushatës janë vetëm mashtrime, pasi nuk janë reflektuar aspak në raport.
Sipas tij, nuk ka platformë të qartë për dialogun me Serbinë, ndërsa premtimi për liberalizimin e vizave është mashtrim tjetër i radhës. /Telegrafi/