Përfaqësuesit e Sindikatës së Pavarur të Shërbimit Korrektues të Kosovës pas takimit me kryeministrin në detyrë, Avdullah Hotin, pezulluan protestën të cilën e nisën me kërkesa për pagesë shtesë.
Frashër Racaj, zëvendëskryetar i Sindikatës së Shërbyesve Korrektues, tha se qeveria u premtoi në realizimin e kërkesave të tyre dhe se shtesat do t’u jepen gjatë muajit mars.
Ndryshe, Sindikata e Shërbimit Korrektues sot ka protestuar para ndërtesës së Qeverisë së Kosovës.
Zëdhënësi i SHKK-së, Florent Gashi ka konfirmuar për Telegrafin mbajtjen e kësaj proteste.
Ai ka thënë se kjo protestë po bëhet për shkak të mos marrjes së shtesave gjatë pandemisë.
“Po protestojnë lidhur me shtesat për punë gjatë pandemisë, ashtu siç i kanë realizuar institucionet tjera të sigurisë. Organizimi i protestës është sindikal, për më shumë ju lutem kontaktoni me kryetarin e Sindikatës”, u shpreh Gashi.
“Stafi i SHKK-së është në vijën e parë të luftimit të Pandemisë COVID-19 dhe i plotëson të gjitha kriteret e parapara me ligj ne bazë të Nenit 20 pika 1 dhe 2 ku përcaktohet kompensimi dhe ne bazë të Nenit 12 pika 1.4 izolimi, pika 1.5 transporti, pika 1.7 trajtimi dhe shërimi i të sëmurëve me COVID-19 dhe pika 1.9. mbikëqyrja shëndetësore e personave të infektuar me COVID – 19”, thuhet në njoftim. /Telegrafi/