Kryeministri i Kosovës, Avdullah Hoti ka përkujtuar heronjtë Fehmi e Xhevë Lladrovci në 22-vjetorin e rënies së tyre, duke thënë se ata na e kujtojnë përkushtimin dhe sakrificën e madhe për liri, pavarësi dhe demokraci.
Hoti përmes një postimi në Facebook, tha se bashkësia ndërkombëtare ishte aleate e luftës së Kosovës, pasi pushka e heronjve shkrepi për të mbrojtur popullin.
“Njëzet e dy vjetori i rënies heroike të Fehmi e Xhevë Lladrovcit dhe bashkëluftëtarëve të tyre, na kujton përkushtimin dhe sakrificën e madhe për liri, pavarësi dhe demokraci. Pushka e tyre shkrepi për të mbrojtur pragun e shtëpisë̈ dhe ekzistencën e popullit tonë, andaj dhe bashkësia ndërkombëtare ishte aleate e fuqishme e luftës sonë̈ të drejtë. Zoti e bekoftë̈ jetën dhe veprën e Fehmi e Xhevë Lladrovcit dhe bashkëluftëtarëve të tyre”, shkruan Hoti.
Gjithashtu, edhe presidenti i Kosovës, Hashim Thaçi ka thënë se Fehmi e Xhevë Lladrovci ishin Azem dhe Shotë Galica e kohës sonë.
Edhe kryetari i AAK-së, Ramush Haradinaj ka thënë se heronjtë Fehmi e Xhevë Lladrovci ishin pjesë e rëndësishme e rrugëtimit tonë të lavdishëm, krah i fortë i lëvizjes për liri e pavarësi. /Telegrafi/
