Kryeministri i Kosovës, Avdullah Hoti, ka reaguar menjëherë pasi lideri i AAK-së, Ramush Haradinaj, ka dalë kundër vendimit të qeverisë së Kosovës për shuarjen e Task-forcës kundër korrupsionit, duke thënë se mund të kuptohet si ndërhyrje politike ose hakmarrje ndaj proceseve të pavarura.
Në reagimin e tij, Hoti ka thënë se politika nuk duhet të përzihet në drejtësi. “Këtë e kemi bërë me vendimet që kemi marr në këta muaj të qeverisjes”.
“Drejtësia duhet ta bëjë punën sipas ligjit, e jo sipas vendimeve të Qeverisë”, ka thënë Hoti, përme një postimi në Facebook, përcjell Telegrafi.
“Kthimi i ligjshmërisë dhe kushtetutshmërisë në vend duhet të jetë angazhim i të gjithëve.
Kjo qeveri është e vendosur për të fuqizuar shtetin ligjor”, ka shkruar Hoti.
“Siguria juridike garantohet vetëm duke respektuar Kushtetutën, ligjet dhe institucionet shtetërore”, ka shkruar ai.
Ndryshe, lideri i AAK-së, Ramush Haradinaj, sot përmes një postimi në Facebook, duke kundërshtuar vendimin e Qeverisë Hoti, për shuarjen e Task-forcës kundër korrupsion, ka thënë se “Në përmirësimin e institucioneve tona duhet të kemi plan. Çdo vendim pa plan, e i aty për atyshëm mund të kuptohet si ndërhyrje politike ose hakmarrje ndaj proceseve të pavarura”
“Shkarkimi i task forcës kundër korrupsionit shkakton pasiguri juridike. Kjo task forcë ka funksionuar më shumë se 10 vite. Kanë hetuar dhe kanë qenë në proces të hetimit të shumë rasteve të profilit të lartë në bazë të mandatit të tyre. Puna e tyre ka treguar që askush nuk është i paprekshëm nga drejtësia. Normalisht ka pasur shumë gjëra të përmirësohen dhe kjo task forcë të fuqizohet, qoftë nga rishikimi funksional ose nga rekomandimet e partnerëve strategjik si ShBA dhe BE”, ka thënë Haradinaj.
Qeveria Hoti më 19 tetor e ka shfuqizuar vendimin nr. 02/110 të datës 26 shkurt 2010, i cili vendim kishte themeluar Taskë-forcën antikorrupsion në kuadër të Policisë së Kosovës./Telegrafi/
