Kryeministri Avdullah Hoti, ka thënë se megjithëse numri i rasteve të reja me COVID-19 ka shënuar rënie, mbetet ende i lartë numri i vdekjeve nga kjo pandemi.
Ai përmes një statusi në Facebook, thekson se shtatori do të rrisë edhe më shumë rrezikun pasi që shumë prindër e nxënës do të jenë në kontakt më njëri-tjetrin.
Hoti u bëri thirrje qytetarëve që të respektojnë masat kundër coronavirusit,
“Ditëve të fundit, si rezultat i respektimit më të mirë të masave, numri i rasteve të reja me covid-19 ka qenë në rënie. Por, për fat të keq, numri i rasteve me fatalitet mbetet tepër i lartë. Shumë familje po humbin të dashurit e tyre.”
“Shtatori është shumë afër kur mijëra nxënës, prindërit e tyre dhe arsimtarët do të jenë në kontakt me njëri tjetri, duke e shtuar shumë rrezikun e infektimit.”
“Prandaj, na duhet kujdes i shtuar. Ju lutem, respektoni masat”, ka shkruar Hoti.
Autoritetet kompetente në Kosovë ende nuk kanë vendosur lidhur me mënyrën se si do të nisë viti i ri shkollor.
Ministria e Arsimit dhe Shkencës së Kosovës ka prezantuar një plan se si do të nisë viti i ri shkollor, por i cili megjithatë pret miratimin edhe të ekzekutivit.
Aty është paraparë që viti i ri shkollor të nisë në tri faza – më datë 1 shtator, 7 shtator dhe grupi tjetër më 10 shtator.
Instituti Kombëtar i Shëndetësisë Publike të Kosovës (IKSHPK) të shtunën ka raportuar për 9 persona të vdekur dhe 169 raste të reja me COVID-19, sëmundjen që e shkakton coronavirusi./Telegrafi/
