Shefi i Grupit Parlamentar të Lidhjes Demokratike të Kosovës, Avdullah Hoti, ka komentuar mbledhjen e sotme të Qeverisë në dorëheqje.
Hoti ka thënë se mbledhja e sotme e Qeverisë reflekton edhe një herë mungesën e kompetencës të kryeministrit në dorëheqje dhe mega Qeverisë së tij, me 5 zëvendëskryeministra, mbi 20 ministra, 80 zëvendësministra e qindra këshilltarë.
Ai ka shtuar se kjo nuk është diçka e re, madje ai ka numëruar disa vendime të Qeverisë që sipas tij janë të kundërligjshme dhe kundër-kushtetuese, transmeton Telegrafi.
“Falja e 50 milionë euro prodhuesve të ujit. Ndarja e mjeteve pa procedura, siç ishte rasti i mbi 800 mijë euro për një OJQ. Urdhërimi i prokurorit si të veprojë në një rast hetimor. Shkarkimi i Bordeve të Ndërmarrjeve Publike që i përgjigjen Kuvendit. Shkarkimi i Bordit të Këshillit Shtetëror të Cilësisë, Vendimi, e më vonë tërheqja, për shpronësim të një objekti privat. Dhënia e tokave të AKP-së komunave me shumicë serbe etj”, ka shkruar Hoti në Facebook.
Në fund, ai ka shtuar se lista e vendimeve antikushtetuese të kësaj qeverie është e gjatë, dhe se riparimi i dëmeve do të marrë kohë./Telegrafi/
