Deputeti i Lidhjes Demokratike të Kosovës, Avdullah Hoti, në cilësinë e kryetarit të Grupit të Miqësisë Kosovë-Izrael, ka njoftuar se ka bërë kërkesë për përkrahjen, inicimin dhe sjelljen në Kuvend për ratifikim të disa marrëveshjeve ndërshtetërore mes Kosovës dhe Izraelit.
Kërkesën ai e ka dërguar në adresë të kryeministrit Albin Kurti dhe kryeparlamentarit Glauk Konjufca.
Marrëveshjet që ka kërkuar Hoti të ratifikohen në Kuvend janë: Marrëveshja për tregti të lirë Kosovë- Izrael, ajo për eliminimin e tatitimit të dyfishtë Kosovë-Izrael, për lëvizje pa viza për qytetarët e dyjave vendeve si dhe marrëveshja për punësim sezonal të punëtorëve të Kosovës në Izrael.
Kosova dhe Izraeli kanë lidhur marrëdhënie diplomatike zyrtarisht më 1 shkurt të vitit 2021.
Njohja nga Izraeli është arritur me nënshkrimin e marrëveshjes ekonomike me Serbinë në Washington, më 4 shtator 2020. /Telegrafi/
