Ish-mesfushori i Manchester Unitedit, brazilian Kleberson ka zbuluar se Ronaldinho e dërgoi atë drejt një nënshkrimi me klubin anglez në vitin 2003.
Të dy lojtarët brazilian u përcollën nga Unitedi pasi të dy ishin pjesë e ekipit brazilian që fitoi Kupën e Botës 2002, por Djajtë e Kuq arritën ta afrojnë vetëm Kleberson nga Atletico Paranaense në një marrëveshje prej 6.5 milionë eurosh.
Ronaldinho nuk ishte larg transferimit në Old Trafford dhe i tha bashkatdhetarit të tij Kleberson se po bashkohej me të në Angli përpara se të kalonte te Barcelona.
“Kishte dy klube të interesuara për të më nënshkruar: Manchester United dhe Leeds”, ka thënë fillimisht Kleberson për revistën FourFourTwo.
“Ishte një zgjedhje e thjeshtë, por ekziston edhe një histori qesharake. Kur u konfirmua interesimi i Unitedit, unë isha me ekipin kombëtar në Francë për Kupën e Konfederatave të FIFA-s”.
“Unë mund ta kujtoj qartë: Isha me Ronaldinho dhe vëllain/agjentin e tij, Assis. Ronaldinho tha: “Ata duan të nënshkruajnë me të dy”.
“Unë i thashë: ‘Në rregull, le të shkojmë, atëherë!’. U gëzova aq shumë që ai do të vinte me mua”.
“U ktheva në Brazil dhe vazhdova të negocioja me Unitedin, por më pas Ronaldinho më mashtroi dhe shkoi të luante në motin e ngrohtë në Barcelona! Ai më dërgoi në Manchester”.
“Kjo është një shaka midis nesh deri më sot. Ai e di se ai më ka një borxh mua”, përfundoi ish-lojtari brazilian.
Ndryshe, Klberson nuk u vlerësua kurrë nga Sir Alex Ferguson, pasi bëri vetëm 20 paraqitje në ligë për Unitedin dhe ishte larguar drejt Besiktasit më 2005. /Telegrafi/