Grupi militant libanez Hezbollah thotë se hodhi gjithsej 62 raketa në një post vëzhgimi izraelit përgjatë kufirit Izrael-Liban të shtunën.
Sulmi erdhi si një “përgjigje fillestare” ndaj vrasjes së një udhëheqësi të lartë të Hamasit në Bejrut në fillim të kësaj jave, përcjell Telegrafi.
Në një deklaratë, Hezbollah tha se luftëtarët e tij filluan një sulm pak pas orës 08:00 me orën lokale në bazën e mbikëqyrjes ajrore Meron në veri të Izraelit si një “përgjigje fillestare” ndaj vrasjes së Saleh Al-Arouri në Beirut të martën.
Ndërkohë Forcat e Mbrojtjes të Izraelit (IDF) thanë në një deklaratë se “afërsisht 40 lëshime” nga Libani në drejtim të zonës së Meron në Izraelin verior u identifikuan pasi sirenat u dëgjuan në Izraelin verior të shtunën.
Alarmet e kuqe – paralajmërimi për një sulm të mundshëm të raketave – u lëshuan për mbi 100 vendndodhje në Izraelin verior të shtunën në mëngjes.
Ushtria izraelite më pas goditi luftëtarët e Hezbollahut, të cilët “morën pjesë në lëshimet”, shtohet në deklaratë.
Ndryshe, në fillim të kësaj jave, ministri i Jashtëm libanez Abdallah Bou Habib i tha CNN se qeveria e tij shpresonte që Hezbollahu të mos përgjigjej ndaj sulmit të Bejrutit, duke theksuar se Libani nuk dëshiron “asnjë përshkallëzim në luftë”.
Izraeli nuk ka marrë përgjegjësinë për sulmin e së martës, me Mark Regev, një këshilltar i lartë i kryeministrit izraelit Benjamin Netanyahu, i cili i tha MSNBC se kushdo që organizoi sulmin “ka një grindje me vetë Hamasin”.
Por nëse përfshirja izraelite konfirmohet, Arouri do të ishte zyrtari më i lartë i Hamasit i vrarë nga forcat izraelite që nga fillimi i luftës që shkaktoi sulmi i Hamasit në Izrael më 7 tetor.
Përveç goditjes së udhëheqjes së Hamasit, sulmi i dukshëm rrezikon gjithashtu zgjerimin e mëtejshëm të arenës së konfliktit Izrael-Hamas. /Telegrafi/