Kevin De Bruyne për momentin është padyshim lojtari më i mirë në Ligën Premier. Kështu së paku mendon bashkëkombësi belg dhe ylli i Chelseat, Eden Hazard.
Futbollisti i Manchester City po shkëlqen këtë sezon nën urdhrat e trajnerit, Pep Guardiolas, pasi skuadra zë vendin e parë në tabelën e ligës elitare angleze, ku kanë tetë pikë më shumë se rivalët e Manchester Unitedit.
De Bruyne ka kontribuar në këtë sukses të Citizens me dy gola dhe gjashtë asistime në 11 paraqitje në Ligën Premier dhe ishte lojtar i ndeshjes në fitoren e Cityt kundër Chelseat.
“City është ekipi më i mirë i Ligës Premier dhe Kevin është një lojtar i rëndësishëm në sistemin e Guardiolës. Është e lehtë të luash me Bruynen sepse është lojtar fantastik”, tha Hazard.
Kujtojmë se De Bruyne u shit nga Chelsea te Wolfsburgu për vetëm 20 milionë euro në janar të vitit 2014 pasi nuk arriti të fitonte një vend prej titullarit te londinezët.
Ndryshe, futbollisti 26-vjeçar u transferua në vitin 2015 te skuadra angleze për 62 milionë euro dhe deri më tani ka shënuar 15 gola në 72 paraqitje për Citizens.
Hazard, Bruyne dhe mesfushori shqiptar me tipare sulmuese, Adnan Januzaj do të luajnë sëbashku sonte kundër Meksikës dhe pas katër ditësh kundër Japonisë. /Telegrafi/