Ministrja e Drejtësisë, Albulena Haxhiu ka paralajmëruar padi ndaj televizionit publik të Kosovës, për artikullin e publikuar lidhur me prokuroren nga Peja, Valbona Disha- Haxhosaj.
Siç kishte shkruar portali i televizionit publik, prokurorja në fjalë është shpërblyer me këtë post nga ministrja Haxhiu, për arrestimin e kryetarit të Istogut, Haki Rugova.
Tutje në artikull thuhet se “Haxhiu e shpërbleu prokuroren Disha Haxhosaj me postin e anëtares së provimit të Jurispodencës, përkundër që kjo e fundit përballet me procedurë disiplinore dhe ka shkelje të kodit të etikës”.
Haxhiu nëpërmjet një shkrimi në Facebook ka theksuar se nuk është kundër artikujve kritik, por sipas saj lajmi i RTK-së, është ‘Fake News”.
“Nuk jam aspak kundër lajmeve e artikujve kritikë, por vërtetë janë bërë shqetësuese artikujt pa asnjë fakt e argument që për bazë kanë vetëm paragjykimin e trillimin. Lajmit të sotëm publikuar në RTK me titull: ‘’MINISTRJA HAXHIU SHPËRBLEN PROKUROREN QË E ARRESTOI HAKI RUGOVËN’’ nuk mund t’i them asgjë tjetër përveç ‘Fake News’”.
“Në Republikën e Kosovës askush nuk mund të ndalojë të drejtën e shprehjes, mendimit të lirë, por prapa kësaj të drejte nuk mund ta fshehim dezinformimin sikur ky artikull. Liria e shprehjes nuk nënkupton asesi cenimin dhe sulmin pa bazë ndaj një personi, kushdo qoftë ai”.
“Me qëllim zbardhjen edhe më shumë të kësaj të pavërtete, mbështjen për median e vërtetë dhe raportimin korrekt, unë do të dorëzojë padi për shpifje ndaj autores së artikullit dhe mediumit që e ka publikuar këtë të pavërtetë. Ky ishte opsioni i fundit si përgjigje ndaj këtij artikulli të rremë dhe kësaj mendësie të sulmit të pabazuar”, ka shkruar Haxhiu, njofton Telegrafi.
