Deputetja e Aleancës për Ardhmërinë e Kosovës (AAK), Teuta Haxhiu ka thënë se Ligji i pagave është në dorën e deputetëve të Kuvendit dhe ata mund ta ndryshojnë atë deri në masën 50%.
Haxhiu, në emisionin “Përballje” me gazetarin Muhamet Hajrullahu në RTV Dukagjini, ka thënë se në Kuvendin e Kosovës ekzistojnë 13 apo 14 kryetarë të Komisioneve të Kuvendit që e kanë pagën më të madhe se Kryeministri.
“Kryetarët e Komisioneve të Kuvendit e kanë pagën më të madhe se të Kryeministrit të vendit, ekzistojnë shifrat”, tha ajo, përcjell Telegrafi.
Videon lidhur me pagën e kryeministrit dhe kryetarëve të Komisionit mund ta ndiqni nga minuta e 27-të.
Deputetja e Aleancës për Ardhmërinë e Kosovës ka thënë se ekziston vetëm një Kryeministër në Kosovë dhe nuk është mirë të krahasohet me kryetarët e Komisioneve.
“Vetëvendosje i ka katër kryetar të Komisioneve që i kanë pagat më të mëdha se Kryeministri i Kosovës. Është zoti Ismajl Kurteshi, Albulena Haxhiu dhe dy të tjerë që i kanë pagat më të mëdha se Haradinaj”.
Deputeti i Lëvizjes Vetëvendosje, Ismajl Kurteshi ka thënë se është dakord që të gjitha pagat në Kosovë, duke filluar nga Presidenti, Kryeministri e deri te Kuvendi të bëhen publike për të gjithë.
“Ne mendojmë se rrogat e të gjitha këtyre kategorive të përmendura, janë më të larta se sa duhet, për shkak të gjendjes në Kosovë”.
Kurteshi ka thënë më tej se këto rroga të larta Vetëvendosje i ka gjetur të tilla, nuk i ka rritur vet.
“Sa i përket Kryetarëve të Komisioneve, ata kanë rreth 250 euro më shumë rrogë se deputetët. Ndërsa deputetët përpos rrogës bazë marrin edhe mëditje që shkojnë në seanca të Kuvendit dhe rroga që shkojnë në mbledhje të Komisioneve”, tha me tej Ismajl Kurteshi.
Haxhiu ka insistuar më tej se me kërkesë të gjashtë deputetëve, Kuvendi mund të ndryshojë Ligjin e pagave.
“Pres të gjitha subjektet politike të reflektojnë”, tha ndër të tjera Teuta Haxhiu në emisionin “Përballje”./Telegrafi/