Në takimin konsultativ të thirrur nga presidentja Vjosa Osmani Sadriu, lideri i Aleancës për Ardhmërinë e Kosovës (AAK), Ramush Haradinaj, ka propozuar që zgjedhjet parlamentare të mbahen më 26 Janar 2025.
Kjo datë përfaqëson opsionin e parë në përputhje me afatet ligjore për organizimin e zgjedhjeve.
Të njëjtin qëndrim e shprehën edhe partitë tjera opozitare, duke theksuar rëndësinë e caktimit të një date për zgjedhjet që do të respektojë procedurat e nevojshme.
Ndërkaq, partitë e pakicave joserbe shprehen të gatshme të pranojnë datën e shumicës, ose datën që do të përcaktojë Presidentja.
“Dëshmimi i bashkëpunimit ndërpartiak është vënë re edhe me mungesën e pjesëmarrjes nga ana e Vetëvendosjes dhe Listës Serbe në këtë takim”.
Haradinaj shprehu shpresën se Presidentja do të shfrytëzojë të drejtën e saj kushtetuese për të marrë parasysh kërkesat e partive parlamentare që ishin pjesë e takimit dhe të caktojë datën e zgjedhjeve më 26 Janar 2025.
Sipas afateve të përcaktuara me legjislacionin në fuqi, Kosova mund të mbajë zgjedhje të rregullta më 26 janar, 2, 9 ose 16 shkurt./Telegrafi/
