Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla, të mërkurën është takuar me James Carafano, Zëvendës Presidentin e “Heritage Foundation”, një prej institucioneve më prestigjioze për politikat demokratike e shtetërore në Shtetet e Bashkuara të Amerikës.
“Biseduam për zhvillimet politike në rajon, veçanërisht për dinamikat rreth dialogut Kosovë-Serbi, duke theksuar domosdoshmërinë që ky proces të përmbyllet me njohje reciproke në kufijtë ekzistues”, tha kryediplomatja e Kosovës.
Sipas një njoftimi, duke shprehur falënderime të përzemërta këtij fondacioni për qëndrimin që ka mbajtur ndaj pavarësisë së Kosovës dhe proceseve në vijim në forcim të subjektivitetit ndërkombëtar, ministrja Haradinaj Stublla kujtoi edhe mbështetjen e dhënë për formimin e Ushtrisë së Kosovës.
“Shpreha falënderimin për përkrahjen e vazhdueshme që Heritage Foundation ka dhënë në avancimin e prioriteteve politike të Kosovës dhe posaçërisht në mbështetjen e dhënë në transformimin e Forcës së Sigurisë së Kosovës në ushtri”, tha Ministrja HaradinajStublla, e cila sot ka filluar vizitën e saj zyrtare në Washington DC. /Telegrafi/