Kryetari i Aleancës për Ardhmërinë e Kosovës, Ramush Haradinaj, bëri homazhe te Kompleksi Memorial i Familjes Berisha dhe në varrezat e Dëshmorëve në Suharekë, ndërsa tha se dhimbja ende është e gjallë dhe se trupat e 20 të vrarëve ende nuk janë kthyer.
Haradinaj tha se edhe pas kaq vitesh ende disa nga trupat e të vrarëve nuk dihet ku janë.
“Janë ditë të dhimbjes këto ditë në Kosovë…. Ta dinë brezat se liria dhe shteti e ka çmimin e vet…”, tha Haradinaj.
Për nder të kësaj masakre është hapur edhe një muze në qendër të këtij qytetit.
Ndryshe, 22 vjet më parë, forcat serbe, fillimisht kishin shtënë me armë zjarri në drejtim të rreth 50 anëtarëve të familjes Berisha, e më pas viktimat e të plagosurit i kishin bartur në një kafiteri, ku i kishin gjuajtur me bomba, për t’u siguruar se askush s’do të mbijetojë.
Prej këtyre viktimave, tre janë që kanë shpëtuar.
Nga ky numër i viktimave, 19 janë nën moshën 18 vjeçare. Ndërkaq, nga 50 viktimat, ende nuk dihet për 20 prej tyre. /Telegrafi/