Euro-komisioneri për zgjerim dhe fqinjësi të mirë, Johannes Hahn për Wiener Zeitung ka folur për çështjen e Maqedonisë dhe për dialogun me Greqinë. Sipas tij, gjërat janë duke shkuar mirë, shkruan Telegrafi Maqedoni.
”Patjetër të gjindet një zgjidhje politike. Tanimë veçse kemi hapur një dritare për të bërë zgjidhje. Deri në zgjedhjet e vitit të ardhshëm në Greqi, kur edhe mund të rritet retorika politike, ne mund të kryejmë shumë punë. Tani për tani marrëdhëniet mes Greqisë dhe Maqedonisë janë përmirësuar ndjeshëm dhe për këtë ne jemi të interesuar që të shohim epilogun kryesor. Jemi vigjilentë që gjërat të shkojnë vetëm mirë dhe për këtë jemi duke punuar së bashku me dy shtetet në fjalë por edhe me faktorët tjerë atje në Ballkan që të kemi një rrugëtim të përbashkët që do të jetë stabilizues i asaj pjese të Evropës.” tha Hahn për gazetën austriake Wiener Zeitung.
Hahn ka përsëritur edhe një herë se një brengë e Maqedonisë është larguar dhe ajo është kriza politike që pengonte rrugëtimin e vendit drejt BE-së dhe NATO-s. /Telegrafi/