Me yje si Gwyneth Paltrow dhe Serena Williams të ulur në rreshtin e parë, veshjet e Alessandro Michele të frymëzuara nga shkëlqimi i vjetër i Hollywoodit u pëlqyen shumë gjatë një shfaqjeje të modës Gucci në Los Angeles.
Jared Leto dhe Macaulay Culkin ishin ndër modelet e shumta që kaluan me qetësi në pistën e ‘Walk of Fame’ në Gucci Love Parade të martën mbrëma.
Ishte një spektakël aq i vrullshëm sa që ngjarja mbylli disa blloqe të bulevardit të ngarkuar të Hollywoodit.
Kjo u dha modeleve hapësirë të mjaftueshme për të dalë nga Teatri Kinez ikonik TCL përpara se të ecnin në të dy trotuaret së bashku me një audiencë të mbushur me yje që përfshinte figura të tilla të njohura si Salma Hayek, Lizzo, Miley Cyrus, Lindsey Vonn, Dwyane Wade, Gabrielle Union dhe James Corden.
Me koleksionin e tij të ri, Michele solli në jetë dashurinë e tij për veshjet e vjetra kinematografike me kapele kauboji, fustane me pupla, pallto me gëzof artificial, kurora diamanti, bluza, pantallona me këmbë të gjera dhe fustane voluminoze.
Ai ofroi një përzierje ngjyrash përmes modeleve të tij që mbanin kostume ngjyrë vjollcë, kafe dhe rozë, së bashku me fustane metalike dhe ari. E zeza ishte një tjetër ngjyrë e preferuar.
Për Michele, ishte një ëndërr e realizuar të zbulonte punën e tij në bulevardin e yjeve, ku tha se mbajtja e shfaqjes pasqyronte “dashurinë e tij të pa frenuar për botën klasike”. /Telegrafi/
