Telegrafi

Guardiola i kënaqur me fitoren ndaj Chelseat

Shkumbin Pireva

Pep Guardiola ka thënë se Manchester City ishte një skuadër tjetër në pjesën e dytë pasi siguruam një fitore 1-0 ndaj Chelseat në Stamford Bridge.

City siguroi një tre pikësh vendimtar për të mbajtur presionin mbi liderët e Ligës Premier, Arsenalit, pasi tani është vetëm pesë pikë mbrapa tyre.

Me ndeshjen pa gola në pjesën e parë, trajneri i Cityt bëri një ndryshim të dyfishtë gjatë pushimit me Rico Lewis dhe Manuel Akanji që zëvendësuan Joao Cancelo dhe Kyle Walker.

Trajneri i Cityt më pas bëri një tjetër ndërrim të dyfishtë me fillimin e pjesës së dytë, me Jack Grealish dhe Riyad Mahrez që hynë dhe menjëherë dhe siguruan golin e fitores.

“Të gjithë menaxherët përpiqen të marrin vendime për të ndihmuar ekipin – ndonjëherë ju jeni duke humbur, por skuadra po luan mirë dhe pse duhet të ndryshoj kur kam ndjenjën se ata po bëjnë mirë?”, ka thënë fillimisht Guardiola pas ndeshjes.

“Sot, pas 20 minutash, sepse duhet t’u jepni pak kohë për të provuar, vendosa që nuk më pëlqente ajo që po shihja. Pra, pse të presim? Kështu që fola me Rodolfon dhe Enzon dhe ne thamë: ‘në rregull, duhet të ndryshojmë diçka përndryshe do të ishte më e vështirë”.

“Të gjithë mund të shihnin që nga minuta e parë e pjesës së dytë, ishte një Man City ndryshe. Dhe kjo dinamikë nga Rico i ndihmoi të gjithë të kishin lirinë e tyre. Ai e ndryshoi lojën nga minuta e parë”.

“Në pjesën e parë, gjithçka ishte e dobët dhe ne nuk mund të mbanim kontakte me anësorët apo mesfushorët sulmues dhe nuk krijuam shumë. Presioni ynë ishte aq i dobët dhe nuk ishim të organizuar mirë”.

“Të gjithë mund të luajnë më mirë, por kur Rico hyri, Rodri luajti më mirë, Kevin De Bruyne luajti më mirë dhe ai ka talentin për ta bërë këtë. Që kur jemi rikthyer, ai ka luajtur për ne dhe është bërë themelor për ne, siç po luan tani”, përfundoi trajneri i Cityt. /Telegrafi/