Eden Hazard vazhdon të mbetet i preferuari kryesor tek Manchester City për afatin kalimtar të verës.
Manchester City fitoi titullin e Ligës Premier këtë sezon disa javë pa përfunduar kampionati i rregullt, duke dominuar totalisht.
Megjithatë, trajneri Pep Guardiola është i interesuar të përforcojë edhe më shumë skuadrën e tij, veçanërisht sulmin për sezonin e ri.
Sipas mediumit britanik Daily Star, menaxheri i Qytetarëve, Guardiola e ka bërë Hazard objektin e tij kryesor të transferimeve të verës.
Hazard nuk pritet të jetë i lirë, por kjo nuk i intereson aspak drejtuesve të Cityt që duan të shpenzojnë për të.
City kanë gati një shifër prej 100 milionë funteve apo plot 115 milionë eurosh për shërbimet e yllit belg.
Kampioni aktual gjithashtu i ofron edhe pagë prej 300 mijë funtesh apo 341 mijë eurosh në javë për të bindur Hazardin të transferohet në Etihad.
Ndryshe, edhe para disa ditësh u raportua se drejtuesit dhe trajneri e duan me çdo kusht belgun në skuadër për sezonin e ri. /Telegrafi/