Kryetari i VMRO-DPMNE-së, Nikolla Gruevski, përmes një statusi në profilin e tij zyrtarë të Facebookut ka vazhduar me thirrjet e tij për mobilizim në mbrojtje të Maqedonisë dhe kundër ligjit për gjuhën shqipe dhe Deklaratën e përbashkët për partive shqiptare. Ai shkruan se kur sulmohet shteti vetëm populli mundet ta mbrojë, këtë sipas tij nuk mundet ta bëjnë politikanët, sidomos kur disa janë në anën që shteti të ndahet, njofton Telegrafi Maqedoni.
Gruevski shkruan se dygjuhësia në Maqedoni është vetëm qëllimi dytësor, pas dygjuhësisë do të nisin përgatitjet për kantonizimin e Maqedonisë hap pas hapi. Madje ai shkruan se shteti ishte duke funksionuar normalisht derisa nuk u sulmua nga qendra të fuqishme nga jashtë.
Gruevski thotë se LSDM-ja do të tentojë ta sulmojë bastionin e fundit në shtet OBRM-PDUKM-në dhe udhëheqjen e saj. Qeveria e re sipas Gruevskit është bërë nën presionin e ashpër të jashtëm ndaj BDI-së, ku më aktivi është një ambasador i huaj pa e përmendur emrin e tij. Nëse votohet qeveria, Gruevski thotë se do jetë qeveri e një ambasadori. Më pas ky ambasador sipas Gruevskit do të dojë që edhe gjykata të jetë e tij, sepse një kohë të gjatë punon në këtë drejtim. Prokurori të veten ka.
“Nëse partitë shqiptare e sjellin në pushtet LSDM-në ne jemi të gatshëm ta mbështesim si qeveri e pakicës me deputetët tonë nëse LSDM-ja heq dorë nga gjuha shqipe dhe platforma e Tiranës”, shkruan Gruevski./Telegrafi/
